On anar tà rondalejar ?

Dab los camins de rondalejada, çò de mei dificile qu'ei de causir. Lo departament que compta uns 6500 quilomètres de camins agençats taus passejaires. Tà 2014, lo Conselh generau que tornarà amainatjar vias existentas. Que tribalharà especiaument sus la senhalizacion tà facilitar l'orientacion e l'informacion deus rondalejaires. Que tornarà hicar a nivèu lo GR 10, lo GR 108 o enqüèra lo GR 653, suu camin de Sent Jaume. La senhalizacion que poderà estar bilingua (francés-occitan) quitament trilingua (francés-occitan-basco) segon las demandas de las comunas sus las quaus e on passan los sendèrs. Tau monde qui's vòlen simplament desplaçar en « mòde doç » (passejaires, ciclistas o cavalièrs) lo departament qu'amainatja tanben çò qui's disen las « vias verdas ». Que començan tot juste las òbras d'ua velorota dens la plana de Nai qui s'espandeish sus 24 quilomètres dont 12 de via verda. Que s'avia tanben la refeccion d'un ancian pont ferroviari suu Gave de Pau. Qu'ei situat suu traçat d'ua anciana via herrada qui serviva a miar lo minerau de hèr dempuish la comuna de Herrèra dinc a la gara de Coarrasa. Panèus de senhalizacion bilingües que son prevists entà la sason qui vien.