Los Pirenèus ne son pas mei ua frontèra

Los poblants deu malh deu Portalet qu'ac esperavan despuish quaranta ans. La barrèra doanèra caduda qu’ei ! Lo Calhau n'ei pas mei ua frontèra, que’s torna har ligam. Sus plaça, un projècte de cooperacion enter lo Conselh generau e lo govèrn d'Aragon qu'ei a bastí's... e pas sonque au sens figurat. Que construseishen un bastiment qui aubergarà las equipas de desnevament de las rotas pendent l'ivèrn. Dens un segond temps, los ancians locaus de las doanas que seràn reabilitats entà vàder espaci socioculturau. Qu’arcuélherà manifestacions culturaus, mustras e que servirà tanben de punt d'informacion.

L'operacion qu'ei miada peu Gropament economic de cooperacion transfrontalèra (GECT) de l'Espaci deu Portalet. Que s'ei podut har dab finançaments europèus qui son autrejats mercés au Programa operacionau de cooperacion territoriau Espanha França Andòrra (Poctefa). Qu'ajuda a desvolopar l’activitat economica suus parçans frontalèrs comuns aus tres país. L'espaci deu Portalet qu’aplega Pirenèus Atlantics e govèrn d'Aragon. La soa presidéncia que càmbia cada dus ans. Qu'ei adara assegurada peus Pirenèus-Atlantics taus dus ans qui vienen.