Los joens qu'an la lor Carta !

Lo Conselh generau 64 e uns partenaris institucionaus que signèn lo 28 de heurèr passat ua Carta d'engatjament en favor deus joens deus Pirenèus Atlantics. Que s’ageish de cobastir ua politica tà « promòver ua egalitat vertadèra e acompanhar lo joenèr de cap tà l'autonomia en tot favorizar la capacitat d'iniciativa e d'engatjament son». Dab aquera Carta, l'Estat, los organismes sociaus, las collectivitats, los establiments d'ensenhament, las associacions, las enterpresas... qu'ensajaràn de hicar en òbra quate enjòcs màgers.

Purmèr, bastir ua politica dab e taus joens, per exemple en sostiéner la creacion d'espacis qui’us seràn dedicats. Que s’ageish, en seguint, de garantir l'egalitat deus territòris, en hicar l'accent sus l'equitat e l'egalitat deus drets, l'accès a la santat e la mobilitat. La Carta que vòu tanben har que lo joen sia « actor deu projècte de vida son» en l’ajudar tà l'orientacion com tà l'insercion. Lo darrèr objectiu qu'ei de melhorar l'accès deus joens a l'informacion sus l'accion publica que'us pertòca. Tà aquò har, que serà, enter autes, creat un apè tà repertoriar los dispositius qui existeishen dejà.

Un eveniment dedicat a la joenessa que i averà tanben, d’ara enlà, tot an.