Entà valorizar la husta d'ací

Perqué anar cuélher aulhors çò qui podem trobar a noste ? Qu'ei tot lo sens d'aquera agéncia de la husta locau apitada per l'Ostau deu Mòble Bearnés (OMB). Entà har lo tribalh de plan, los artisans menusèrs qu'an sovent tendéncia a crompar la husta en çò de negociants qui hèn viéner esséncias de l'estrangèr... dab totas las consequéncias negativas que coneishem. Que vòu díser sovent : transportar la husta capvath Euròpa sancèra, multiplicar los trajèctes e aver un bilanç carbòni deus mei pesucs. L'Ostau deu Mòble que s'ei balhat prumèr com mission d'informar los professionaus sus las ressorças locaus disponiblas. Que s'ei concretizat devath la forma de la banca de la husta en Bearn haut. Qu'èra dejà ua prumèra etapa tà hicar en relacion forastièrs e artisans. Que pòden atau profieitar de produits de qualitat hauta e a portada de man. Dab aquera agéncia de la husta en linha, sostienuda peu programa europèu LEADER e peu Conselh generau, que passan a la velocitat superiora. Qu'avetz atau la possibilitat de consultar anóncias de venta de produits o alavetz que'n podetz depausar ua. Que podetz tanben plear ua ficha professionau entà figurar dens l'annuari de l'OMB. Dab 211 000 ectaras, la seuva qu'aucupa un quart deu territòri deus Pirenèus Atlantics. Que's pòt har huec de hòrt de lenha !